काठमाडौं । वाणिज्य बैंकहरुले गत आर्थिक वर्ष २०८०/८१ मा ६४ अर्ब १५ करोड रुपैयाँ मुनाफा आर्जन गरेका छन् । बैंकहरुले हालसम्म सार्वजनिक गरेको अपरिष्कृत वित्तीय विवरण अनुसार उक्त नाफा आर्जन गरेका हुन् ।
वाणिज्य बैंकहरुले गत आर्थिक वर्षमा अघिल्लो आर्थिक वर्षको तुलनामा आफ्नो नाफामा १३.४० प्रतिशतले वृद्धि गरेका छन् । जबकि वाणिज्य बैंकहरुले आघिल्लो आर्थिक वर्षमा ५६ अर्ब ५७ करोड ४४ लाख रुपैयाँ नाफा आर्जन गरेका छन् ।
सो अवधिमा सबैभन्दा बढी नाफा कमाउनेमा नबिल बैंक अग्रस्थानमा छ । नबिल बैंकले अघिल्लो आर्थिक वर्षको तुलनामा आफ्नो नाफामा १०.२३ प्रतिशतले सुधार गर्दै ७ अर्ब ६ करोड रुपैयाँ नाफा आर्जन गरेको छ । यसैगरी दोस्रोमा ग्लोबल आइएमई बैंकले सबैभन्दा बढी ६ अर्ब १ करोड ६२ लाख रुपैयाँ नाफा आर्जन गरेको छ ।
तर अघिल्लो आर्थिक वर्षको तुलनामा भने प्रभु बैंकले आफ्नो नाफामा उल्लेखनीय सुधार गरेको छ । सो बैंकले आफ्नो नाफामा १४९९.०४ प्रतिशतले वृद्धि गर्दै ४ अर्ब ४८ करोड ८ लाख रुपैयाँ कमाएको छ ।
यसैगरी नाफा वृद्धिदरका हिसाबले कुमारी बैंक दोस्रो स्थानमा रहेको छ । अघिल्लो वर्षको तुलनामा कुमारी बैंकले नाफा ३४५.६७ प्रतिशतले बढाउँदै २ अर्ब ३० करोड ८२ लाख रुपैयाँ कमाएको छ भने नाफा वृद्धिदरमा प्राईम कमर्सियल बैंक तेस्रो स्थानमा रहँदै २६७.१९ प्रतिशतले वृद्धि गरी ३ अर्ब ७७ करोड ४३ लाख रुपैयाँ खुद मुनाफा आर्जन गरेको छ ।
