काठमाडौं । तराईका धेरै स्थानमा हुस्सु र कुहिरो लागेको पूर्वदेखि मध्य तराईसम्मका स्थानमा बाक्लो कुहिरो र हुस्सु लागिरहेको छ । पश्चिम नेपालमा भने आज भिजिविलिटी केही बढी छ ।
सिमरामा बिहान पौने ६ बजेको भिजिविलिटी १०० मिटर रहेको थियो । विराटनगरको भिजिविलिटी २०० मिटर रहेको मौसमविद् सञ्जिव अधिकारीले जानकारी दिए ।
चन्द्रगढीको ४००, नेपालगञ्जको भिजिविलिटी ५००, भैरहवाको ७०० र धनगढीको भिजिविलिटी १२०० मिटर रहेको छ । काठमाडौंको भिजिविलिटी भने ६ किलोमिटर छ ।
“तराईका क्षेत्रमा बिहान हवाई सेवा प्रभावित हुने देखिन्छ । काठमाडौंमा भने विमान उडान र अवतरणमा समस्या हुनेछैन,” मौसमविद् अधिकारीले भने, “तराईमा धेरै स्थानमा मध्याह्नसम्म हुस्सु र कुहिरो लाग्ने देखिन्छ ।” दुई किलोमिटरभन्दा कम भिजिविलिटीमा विमान उडान र अवतरणमा समस्या हुन्छ ।
