काठमाडौं । स्पेनिस क्लब बार्सिलोनाले स्पेनिस शीर्ष डिभिजन लिग ला लिगामा सेल्टा भिगोविरुद्ध १–० को कठिन जित निकालेको छ ।
बुधबार बार्सिलोनालाई घरेलु मैदान स्पोटिफाइ क्याम्प नोउमा जित दिलाउन लामिन यामल निर्णायक बने । यामलले दिलाएको अग्रतालाई नै अन्तिम समयसम्म जोगाउँदै बार्सिलोनाले जित हासिल गरेको हो ।
जितसँगै बार्सिलोनाले तालिकामा ८२ अंक जोडेको छ । बार्सिलोनाले ३२ खेल खेल्दा २७ जित, एक बराबरी र चार हारसहित यो नतिजा आत्मसाथ गरेको हो ।
पराजित भिगो भने हारसँगै ४४ अंकका साथ तालिकाको सातौँ स्थानमा सीमित छ ।
