काठमाडौं । सरकारले दशैंका लागि बिक्री गरिने खसीबोका तथा च्यांग्राको मूल्य तोकेको छ। सरकार मातहतको खाद्य व्यवस्था तथा व्यापार कम्पनीले सोमबार मूल्य तोकेको हो।
जिउँदो खसीबोकाको मूल्य प्रतिकिलो ६८० रुपैयाँ तोकिएको छ भने च्यांग्राको १ हजार २६० रुपैयाँ तोकिएको छ। तोकिएको मूल्यमा प्रतिकेजी १० रुपैयाँ छुट हुने खाद्य संस्थानकी प्रवक्ता सर्मिला न्यौपानेले जानकारी दिइन्।
२ हजार खसी र १ हजार च्यांग्रा ल्याइएको न्यौपानेले बताइन्। जसका लागि ८ करोड ३३ लाख ४० हजार रुपैयाँ बजेट विनियोजन गरिएको छ।
थापाथलीस्थित बिक्री केन्द्रबाट खसीबोका मंगलबार बिहान ८ बजेबाट बिक्री सुरु हुने उनले जानकारी दिइन्।
