काठमाडौं । अमेरिकाका वर्तमान राष्ट्रपति जो वाइडेन र पूर्वराष्ट्रपति डोनाल्ड ट्रम्पको पहिलो डिबेट सीएनएनमा सुरु भएको छ । उनीहरू दुईमध्ये एकले यसपटक राष्ट्रपति पदमा जित्ने निश्चित छ । ५ नोभेम्बरमा हुने चुनावअघि हुने दुईवटा डिबेटमध्ये यो पहिलो हो ।
कहाँ र कहिले हुँदै छ डिबेट ?
एटलान्टा जर्जियाबाट यो सीएनएनमार्फत लाइभ हुँदै छ । उक्त कार्यक्रममा सीएनएन इन्टरनेसनल, सीएनएन एन इस्पानोल, सीएनएन म्याक्स र सीएनएन वेवसाइटबाट पनि प्रसारण गरिने जनाइएको छ । त्यसलाई बीबीसीले पनि कभरेज गर्ने र विश्लेषण लाइभ ब्लगमा ट्युन गर्न बीबीसीले आग्रह गरेको छ ।
नियम के–के छन् ?
उक्त डिबेटको भेट्रान सीएनएन एंकर जेक टप्पर र डाना बासले मोडरेट गर्दैछन् । उक्त नेटवर्कका अनुसार डिबेट ९० मिनेटसम्म चल्नेछ । दुईवटा कमर्सियल ब्रेक हुनेछन् ।
दुई उमेदवारको बिहीबार पोडियम प्लेसमेन्ट र क्लोजिङ स्टेटमेन्टका लागि नेपालको शैलीमा गाई कि त्रिशूल शैलीमा सिक्का उफार्ने काम भइसकेको छ ।
जसअनुसार बाइडेन स्क्रिनको दायाँ साइडमा हुनेछन् । बाइडेनको वायाँतर्फ ट्रम्प हुनेछन् । अन्तिम वक्ता ट्रम्प हुनेछन् । अर्थात् क्लोजिङ स्टेटमेन्ट पहिला बाइडेनले दिनेछन् ।
दुवै उमेदवार डिबेटमा उभिनेछन् । बाइडेनले बस्नका लागि अनुरोध गरेको भन्ने रिपोर्ट गलत भएको उनको क्याम्पेन सम्बद्धहरूले बताएका छन् । उक्त इभेन्टका क्रममा क्याम्पेनका स्टाफले कुरा गर्न पाउने छैनन् । ब्रेकको समयमा समेत उक्त अनुमति नभएको बताइएको छ ।
दुवैलाई एक/एकवटा कलम, पेपरको एउटा प्याड र एक बोतल पानी दिइनेछ । तर, कुनै सामग्री वा पूर्वलिखित नोट स्टेजमा लैजान अनुमति छैन ।
पहिलाको जस्तै उनीहरूको माइक्रोफोन बोल्न आवश्यक परेको बेलामाबाहेक म्युट गरिनेछ । स्टुडियो अडियन्स पनि हुने छैनन् । सीएनएनले समय तोकेर सभ्य छलफल गराउनेछ ।
सन् १९६० पछि पहिलोपटक यसपटक डिबेट चुनावको मितिभन्दा धेरै अगाडि हुन लागेको हो । (एजेन्सीहरू)
