विराटनगर । नेपाली कांग्रेस मोरङले बीपी कोइरालाको ४२औँ स्मृति दिवसमा विशेष कार्यक्रमको आयोजना गरी मनाउने तयारी गरेको छ । आइतबार सुनवर्षी नगरपालिका वडा नम्बर ९ मा रहेको बीपी केन्द्रमा खुला कविता प्रतियोगिताको आयोजना हुने छ ।
बीपी स्मृति दिवसको सन्दर्भ पारेर स्वास्थ्य शिविर, रक्तदान र कविता प्रतियोगिता आयोजना गर्ने निर्णय भएको नेपाली कांग्रेस मोरङले जनाएको छ ।
कार्यक्रमअनुसार शनिबार विराटनगरको रामजानकी मन्दिर परिसरमा वृहत् आँखा शिविरको आयोजना गरिने र यसमा ठूलो संख्यामा सर्वसाधारण सहभागी हुने अपेक्षा गरिएको कांग्रेसले जनाएको छ ।
शिविरमा निःशुल्क स्वास्थ्य जाँचको सुविधा दिइने बताइएको छ । मोरङमा रगतको अभावलाई मध्यनजर गर्दै त्यही दिन रक्तदान कार्यक्रम पनि गरिने जिल्ला सभापति डिगबहादुर लिम्बूले बताए ।
