एजेन्सी । अल कायदाका संस्थापक एवम् सेप्टेम्बर हमलाका प्रमुख योजनाकर्ता ओसामा बिन लादेनको ‘नजिकका सहयोगी’लाई पक्राउ गरेको पाकिस्तानी अधिकारीहरूले शुक्रबार बताएका छन्।
पञ्जाबको सबैभन्दा बढी जनसङ्ख्या भएको प्रान्तका आतंकवाद विरोधी अधिकारीहरूले विध्वंशकारी गतिविधिहरूको योजना बनाएको र देशका महत्त्वपूर्ण प्रतिष्ठानहरूलाई लक्षित आक्रमण गर्न खोजेको आरोपमा गुजरात सहरबाट अमिन उल–हकलाई पक्राउ गरेका हुन्।
‘अमिन उल–हकको गिरफ्तारी पाकिस्तान साथै विश्वभर आतंकवादसँग लड्न जारी प्रयासहरूमा ठुलो विजय हो,’ पञ्जाबको आतंकवाद विरोधी विभागको एक विज्ञप्तिमा भनिएको छ।
‘उनलाई संयुक्त राज्य अमेरिका, युरोपेली संघ र संयुक्त राष्ट्रसंघले अल–कायदा र बिन लादेनको सहयोगीको रूपमा सूचीबद्ध गरेको थियो,’ पञ्जाबको आतंकवाद विरोधी विभागका प्रमुख उस्मान अकरम गोनादालले पत्रकार सम्मेलनमा भने।
अफगानिस्तानबाट पश्चिमी नाटो सेना फिर्ता भएपछि उनी फेरि देखा परेका थिए। उनले अगस्टमा अफगानिस्तानको भ्रमण गरेर अल–कायदाको पुनर्गठन गर्ने प्रयास सुरु गरेका थिए।
नाटो समर्थित अमेरिकी सेनाले सेप्टेम्बर ११ को आक्रमणमा संलग्न अल–कायदाका लडाकुहरूलाई हस्तान्तरण गर्न अस्वीकार गरेको भन्दै सन् २००१ मा तालिबानको पहिलो शासनलाई अपदस्थ गरेको थियो।
आक्रमणका प्रमुख योजनाकर्ता बिन लादेन पछि पाकिस्तानमा बसेको पत्ता लागेको थियो र उनको सन् २०११ मा अमेरिकी कारबाहीमा गोली लागी मृत्यु भएको थियो।
तालिबानले अफगानिस्तानमा दुई दशक लामो लडाइँपछि अमेरिकालगायत उसका सहयोगी मुलुकको समर्थन प्राप्त सरकारलाई विस्थापित गरेर सन् २०२१ मा सत्ता फिर्ता लिएको छ।
