काठमाडौं । प्रधानमन्त्री केपी शर्मा ओलीले भारतीय प्रधानमन्त्रीले नेपाल–भारत प्रबुद्ध समूह (ईपीजी)को प्रतिवेदन बुझ्दा राम्रो हुने बताएका छन् । ओलीले भारतीय प्रधानमन्त्री नरेन्द्र मोदी र आफूले सल्लाह गरेरै ईपीजी बनाएको भए पनि भारतीय पक्षले प्रतिवेदन नबुझेको बताए ।
सोमबार राष्ट्रिय प्रजातन्त्र नेपालका अध्यक्ष कमल थापाले लेखेको पुस्तक ‘नाकाबन्दी र भूराजनीति’को लोकार्पण समारोहमा उनले ईपीजीले भारतीय प्रधानमन्त्रीले बुझेपछि नेपालको प्रधानमन्त्रीलाई बुझाउने निर्णय गरेकाले आफूले बुझ्न नपाएको पनि बताए ।
उनले आफूहरूले प्रतिवेदन बुझ्न र प्रतिवेदनमा उल्लेखित विषयहरूमाथि छलफल गर्न आग्रह गरिरहेको बताए । प्रधानमन्त्री ओलीले सन् १९५० को सन्धिलगायतका विषयको पुनःमूल्यांकन हुनुपर्ने बताए ।
"मोदीजी र मैले कुरा गरेरै प्रबुद्ध व्यक्तिहरूको समूह बनाएका थियौँ । चार जनाको समूह बनाएर दुई वर्षसम्म काम गर्यो । डा. भेषबहादुर थापाजस्ता प्रबुद्ध व्यक्तित्व, निलाम्बर आचार्यजस्ता प्रबुद्ध व्यक्तित्व । उहाँहरूकै अगुवाइमा हामीले गरेका थियौँ । तर के कारणबाट भारतले त्यो बुझेको छैन," उनले भने ।
प्रधानमन्त्री ओलीले छिमेकी देशहरूसँग राष्ट्रिय हितको पक्षमा खुलस्त कुरा गर्नुपर्ने बताए । उनले छिमेकी देशहरूसँग एकको विरुद्ध अर्को कार्ड नखेलिने पनि स्पष्ट पारे ।
