काठमाडौं । भ्रष्टाचार निवारण ऐन संशोधन सम्बन्धी विधेयकमा हदम्याद सम्बन्धी व्यवस्था हटाउन सरकार तयार भएको छ ।
गृहमन्त्री रमेश लेखकले राज्यव्यवस्था तथा सुशासन समितिमा भ्रष्टाचार मुद्दामा ५ वर्षे हदम्याद हटाउने प्रतिबद्धता जनाएका हुन् ।
“विधेयकबाट ५ वर्षे हदम्याद हटाएर पुरानै कायम राखौँ,” गृहमन्त्री लेखकले भने, “माननीयहरूको संशोधन छ । जहिले जुनसुकै मुद्दा चल्न सक्छ भन्ने माननीयहरूको संशोधन छ । सरकार हटाउन तयार छ ।” उनले भ्रष्टाचारमा जहिलेसुकै मुद्दा चलाउनसक्ने अवस्था राख्न सहमति जनाएका छन् ।
