चितवन । अर्थमन्त्री डा प्रकाशशरण महतले एनसेलको सेयर बिक्रीका विषयमा अहिलेसम्म सरकारलाई जानकारी नभएको बताएका छन् ।
चितवनमा पत्रकारहरुसँगको कुराकानीमा उनले एनसेलको सेयर बिक्रीका विषयमा आधिकारिकरूपमा सरकारलाई जानकारी नभएको बताएका हुन् ।
उनले भने, “हामी सूचना लिइरहेका छौँ । यसको नियमन गर्ने निकाय टेलिकम हो । यो ठूलो किनबेच गर्दा अनुमति लिनुपर्ने व्यवस्था छ ।”
कुराकानीको क्रममा उनले देशको अर्थतन्त्र सुधारको गतिमा रहेको जानकारी दिए ।
उनले भने, “नेपालमा आउने विदेशी पर्यटकको सङ्ख्या र विप्रेषण आप्रवाह रेमिट्यान्स बढेको छ । समस्यामा परेका व्यवसायीको समस्या समाधान हुन्छ । अर्थतन्त्र विस्तारै लयमा फर्कन्छ । समग्रमा विदेशी रेमिट्यान्स ३० प्रतिशतले बढेको छ । पर्यटकको चाप बढ्दा पर्यटन व्यवसायी उत्साहित भएका छन् । ”
उनले घरजग्गाको कारोवार सुधार हुन लागेको पनि बताए ।
अर्थतन्त्र सुधारका लागि धेरै नीतिगत निर्णय भएको जानकारी दिँदै महतले ती निर्णयबाट भएको लगानीले प्रतिफल दिन समय लाग्दा अर्थतन्त्रमा केही समस्या देखिएको बताए ।
