काठमाडौं । विश्वका सात वटा महादेशका अग्ला हिमाल आरोहण गर्ने अभियान अन्तर्गत पर्वतारोही प्रकाशराज पाण्डेले दक्षिण अमेरिकी महादेशको सबैभन्दा अग्लो हिमाल अकोन्कागुआ आरोहण गरेका छन् ।
आरोही पाण्डेले फरबरी ६ मा विहानको ७ः५० मिनेटमा ६ हजार ९ सय ६१ मिटर अग्लो सो हिमाल आरोहण गरेको पाण्डेले जानकारी दिए ।
प्रधानमन्त्री केपी शर्मा ओलीले अभियानमा सफलताको शुभकामना दिँदै नेपालको राष्ट्रिय झण्डा दिएर पर्वतारोहणको लागि बिदाइ गरेका थिए । प्रधानमन्त्री निवास बालुवाटारमा आयोजित कार्यक्रममा प्रधानमन्त्री ओलीले पाण्डेलाई राष्ट्रिय झण्डा हस्तान्तरण गर्दै आरोहण अभियान सफलताको शुभकामना व्यक्त गरेका थिए ।
सगरमाथा, मनास्लु, आमादब्लम लगायत नेपालका विभिन्न हिमालको सफल आरोहण गरिसक्नु भएका पाण्डेले सात महादेशका अग्ला हिमाल चढ्ने अभियान अन्तर्गत २०२४ को जुनमा युरोपको उच्च हिमशिखर माउण्ट एलब्रस आरोहण गरेका थिए । सोही वर्षको नोभेम्बर महिनामा अफ्रिकाको अग्लो चुचुरो किलिमञ्जाको सफल आरोहण गरेका थिए ।
