काठमाडौँ । नेपाल बार एसोसिएसनको आर्थिक वर्ष २०८०/८१ को वार्षिक साधारण सभा २०८२ वैशाख ६ गते हुने भएको छ । काठमाडौँ बबरमहलस्थित कार्की बैंक्युटमा बारको वार्षिक साधारणसभा हुने बारकी महासचिव अञ्जिता खनालले जानकारी दिएकी छन् ।
वार्षिक साधारण सभामा आव २०८०/८१ को लेखा परीक्षण प्रतिवेदन पेस हुने, महासचिव र कोषाअध्यक्षको प्रतिवेदनमाथि छलफल हुने तथा आव २०८०/८१ को लेखापरीक्षक र पारिश्रमिक तोक्ने निर्णय हुने एसोसिएसनले जनाएको छ ।
शुक्रबार नेपाल बार एसोसिएसनको २७औँ केन्द्रीय कार्यसमितिको निर्वाचन सम्पन्न भएको छ । देशभरको मतपेटिका संकलन भएपछि सम्भवतः आइतबारदेखि मतगणना सुरु हुने निर्वाचन समितिले जनाएको छ ।
साधारणसभाकै दिन २७औँ कार्यसमितिद्वारा पदभार ग्रहण तथा हस्तान्तरणको कार्यक्रम रहेको महासचिव खनालले जानकारी दिएकी छन् ।
