काठमाडौं । संयुक्त राज्य अमेरिकाको काेलाेराडाेकाे सर्वोच्च अदालतले रिपब्लिकन नेता डोनाल्ड ट्रम्प राष्ट्रपति चुनाव लड्न याेग्य नभएकाे बताएकाे छ।
अमेरिकी संविधानको १४ औं संशोधनको धारा ३ को प्रयोग गरी राष्ट्रपति चुनावका लागि अयोग्य ठहरिएको यो पहिलो पटक हो। यसअघि अमेरिकाका धेरै राज्यमा ट्रम्पलाई चुनाव लड्न प्रतिबन्ध लगाउने प्रयास असफल भएको थियो।
मंगलबार लिइएको याे निर्णय कोलोराडो राज्यमा मात्र लागू हुनेछ। यस निर्णयमा पुनरावेदन विचाराधीन छ, त्यसैले यसलाई अर्को महिनासम्म स्थगित गरिएको छ। सर्वोच्च अदालतले आफ्नो फैसलामा लेखेको छ, ‘हामी अनौपचारिक रूपमा याे निष्कर्षमा पुगेका छैनौं। हामी हाम्रा अगाडि रहेका प्रश्न र त्यसको नतिजा कत्तिको ठुलो हुने हाे भन्ने बारेमा सचेत छौं।’
यो निर्णय कोलोराडोको तल्लो अदालतको न्यायाधीशले दिएको पहिलेको निर्णयको सीधा विपरित हो। उक्त निर्णयमा संविधानको १४ औं संशोधन अर्थात् विद्रोहको दफा उक्त उपधारामा उल्लेख नभएकाले राष्ट्रपतिका हकमा लागू नहुने उल्लेख गरिएको थियो।
यद्यपि, सोही तल्लो अदालतका न्यायाधीशले पनि २०२१ मा अमेरिकी क्यापिटल दंगामा ट्रम्प संलग्न भएको पत्ता लगाएका थिए।२०२० को राष्ट्रपति चुनावमा जो बाइडेनको विजयलाई स्वीकार नगरी ट्रम्पका समर्थकहरू क्यापिटल हिलमा प्रवेश गरेका थिए।
