काठमाडौं । पाकिस्तानको एक आतंकवादविरोधी अदालतले शुक्रबार आठजना पत्रकार र सामाजिक सञ्जाल कमेन्टेटरहरूलाई जन्मकैदको सजाय सुनाएको छ ।
यी व्यक्तिहरूलाई जेलमा रहेका पूर्वप्रधानमन्त्री इमरान खानको समर्थनमा गरिएको अनलाइन गतिविधिसँग जोडिएका आतंकवादसम्बन्धी अपराधमा दोषी ठहर गरिएको हो ।
यो सजाय सन् २०२३ मे ९ मा भएका हिंसात्मक विरोध प्रदर्शनपछि दर्ता गरिएका मुद्दाहरूसँग जोडिएको छ । त्यतिबेला खानका समर्थकहरूले उनको गिरफ्तारीपछि सैन्य संस्थाहरूमा आक्रमण गरेका थिए ।
त्यसयता सरकार र सेनाले खानको पार्टी र विरोधका आवाजविरुद्ध व्यापक स्तरमा कारबाही गरिरहेका छन् । यस क्रममा आतंकवादविरोधी कानुन र सैन्य अदालतहरूको प्रयोग गर्दै राज्य संस्थामाथि आक्रमण र हिंसा भड्काएको आरोपमा सयौँ अभियुक्तहरूमाथि मुद्दा चलाइएको छ ।
अदालतले निर्णयमा के भन्यो ?
अदालतले आफ्नो निर्णयमा आरोपितहरूको कार्य पाकिस्तानी कानुनअनुसार आतंकवादको दायराभित्र पर्ने र उनीहरूको अनलाइन सामग्रीले समाजमा डर र अशान्ति फैलाएको ठहर गरेको छ ।
अदालतका कागजातहरूका अनुसार सजाय पाउने अधिकांश व्यक्ति पाकिस्तानबाहिर रहेका थिए र कारबाहीको क्रममा उपस्थित थिएनन ।
को–को व्यक्ति दोषी ठहरिए ?
अदालतको फैसलाअनुसार दोषी ठहरिएकाहरूमा पूर्वसेना अधिकारीबाट युट्युबर बनेका आदिल राजा र सैयद अकबर हुसैन, पत्रकार वजाहत सइद खान, साबिर शाकिर र शाहीन सहबाई, कमेन्टेटर हैदर रजा मेहदी तथा विश्लेषक मोइद पिरजादा रहेका छन् ।
अदालतले जन्मकैदको सजायसँगै थप जेल सजाय र जरिवाना पनि तोकेको छ । जरिवाना नतिरेमा थप जेल सजाय हुने आदेश दिइएको छ । सबै सजायहरूको पुष्टि इस्लामावाद हाइकोर्टले गर्ने बताइएको छ ।
