काठमाडौँ। पोखरा अन्तर्राष्ट्रिय विमानस्थल भ्रष्टाचार प्रकरणका प्रतिवादी रहेका पूर्वमन्त्री डा. रामशरण महतको स्वास्थ्य अवस्थाबारे मेडिकल जाँच गर्न विशेष अदालतले आदेश दिएको छ।
बिहीबार विशेष अदालतका न्यायाधीशत्रय नारायणप्रसाद पौडेल, डिल्लीरत्न श्रेष्ठ र विदुर कोइरालाको इजलासले स्वास्थ्य परीक्षणको रिपोर्ट बुझ्ने आदेश दिएको हो।
डा.महतको हकमा पत्नी रोशनी महतले इजलासमा उपस्थित हुने निवेदन दिँदै आफ्नो पति अल्जाइमर्स रोगबाट पीडित भएको र होस ठेगानमा नरहेको बताएपछि इजलासले स्वास्थ्य परीक्षणको जाँच बुझ्न आदेश दिएको हो।
अख्तियारले पूर्वमन्त्री महतविरूद्ध विमानस्थल निर्माणमा परिमार्जित २१ करोड ५९ लाख अमेरिकी डलर अनुसार परियोजना कार्यान्वयन गर्ने स्वीकृतिका लागि मन्त्रिपरिषद्मा प्रस्ताव पेस गरेको भन्दै बदनीयतपूर्ण निर्णय गरेको अभियोग लगाएको छ।
