नयाँदिल्ली । भारतीय प्रहरीले सोमबार नयाँल्लिीको केन्द्रमा हजारौँ प्रदर्शनकारीलाई संसद्तर्फ मार्च गर्न रोक्न अश्रुग्यास प्रहार गरेको छ ।
प्रदर्शनकारीहरूले शिक्षामन्त्रीको राजीनामा र व्यापक परीक्षा सुधारको माग गरिरहेका थिए । धेरैजसो युवा विद्यार्थी रहेका प्रदर्शनकारीहरू नयाँ दिल्लीको मुटुमा रहेको जन्तर मन्तर प्रदर्शन स्थलमा भेला भएका थिए।
यो अनलाइनमाध्यममार्फत् प्रेरित आन्दोलनले शिक्षा प्रणाली र बेरोजगारीप्रति व्यापक आक्रोशलाई समेटेको प्रदर्शनकारी समूहले दावी गरेको छ । प्रहरीले प्रदर्शनकारीहरूमाथि अश्रुग्यासका गोला प्रहार गर्दा उक्त क्षेत्र कोलाहल मच्चिएको थियो भने प्रदर्शनकारीहरूले ढुङ्गामुढा गरेका देखिन्थ्यो ।
द्वन्द्वमा दर्जनौँ प्रदर्शनकारी र प्रहरी कर्मचारी घाइते भएको प्रत्यक्षदर्शीहरूले बताएका छन् । तनाव बढ्दै गएपछि दिल्ली प्रहरीले प्रदर्शनकारीहरूलाई संयम अपनाउन र ‘कुनै गैरकानुनी वा हिंसात्मक गतिविधिमा संलग्न नहुन’ आग्रह गर्दै विज्ञप्ति जारी गरेको छ ।
प्रदर्शनकारीहरूले परीक्षामा प्रश्नपत्र बाहिरिने, प्राविधिक समस्या जस्ता अनियमितताका कारण शिक्षामन्त्री धर्मेन्द्र प्रधानको राजीनामा माग गरिरहेका छन् । उनीहरूले लगातार परिरहेको मनसुनी वर्षा र व्यापक प्रहरी अवरोधलाई चुनौती दिँदै राजधानीमा करिब पाँच वर्षयताको सबैभन्दा ठूलो प्रदर्शनमा भाग लिएका थिए ।
“हाम्रो देशलाई यस्तो सरकार चाहिन्छ जसले युवाहरूले भनेको कुरालाई ध्यान दिन्छ र आफ्ना गल्ती सुधार्न तयार हुन्छ”, आन्दोलनकारी विद्यार्थी १८ वर्षीय सुमित कुमारले भने, “भविष्य हाम्रो हो, यी राजनीतिज्ञहरूको होइन ।” प्रदर्शनका क्रममा नयाँ दिल्लीको केन्द्रमा इन्टरनेट सेवा अवरुद्ध भएको थियो जुन प्रहरीले अनुमति नदिएको प्रदर्शन थियो।
यो प्रदर्शन शनिबार प्रमुख कार्यकर्ता सोनम वाङचुकलाई जबरजस्ती अस्पताल लगिएपछि भएको हो, जसले ‘ककरोच जनता पार्टी’ (सीजेपी) ले सुरु गरेको आन्दोलनको समर्थनमा उनको २० दिन लामो अनशनलाई अचानक हस्तक्षेप गरेको थियो । सीजेपीले मे महिनादेखि सामाजिक सञ्जालमा लाखौँ शुभेच्छुकहरू जुटाएको छ र यो सन् २०२४ मा तेस्रो पटक निर्वाचित राष्ट्रवादी प्रधानमन्त्री नरेन्द्र मोदीका लागि ठूलो चुनौती बनेको छ । रासस
