न्युयोर्क । अमेरिकाको राष्ट्रपतिमा नवनिर्वाचित डोनाल्ड ट्रम्पविरुद्ध परेको मुद्दामा फैसलाको मिति स्थगित भएको छ ।
अदालतले उनीविरुद्धको मुद्दाको फैसलाको मिति १९ नोभेम्बरका लागि स्थगित गरेको हो । सन् २०१६ को चुनावअघि एक पोर्न स्टारसँगको कथित यौन सम्बन्धलाई लुकाउन ट्रम्पले व्यापारिक रेकर्डहरू कपटपूर्ण तरिकाले हेरफेर गरेको विषयमा उनीविरुद्ध गत मे मा ३४ वटा फौजदारी अभियोगमा दोषी ठहर गरिएको थियो ।
न्यायाधीश जुआन मर्चनले उच्च अदालतको राष्ट्रपतिको उन्मुक्तिसम्बन्धी हालैको फैसलाको आधारमा मुद्दा खारेज गर्ने निर्णय गरेमा ट्रम्पलाई राहत मिल्नेछ । यसअघि उच्च अदालतले ६–३ को बहुमतले राष्ट्रपतिहरूले कार्यालयको दायरामा रहँदा गरेका कामहरूका लागि व्यापक छुट पाउने निर्णय गरेको थियो ।
चुनावअघि ट्रम्पका वकिलहरूले उच्च अदालतको निर्णयका आधारमा मुद्दा खारेज गर्न माग गरेका थिए । यसलाई अभियोजकहरूले दृढतापूर्वक अस्वीकार गरेका छन् । यदि न्यायाधीश मर्चनले त्यस आधारमा मुद्दा खारेज गरे भने ७८ वर्षीय ट्रम्पलाई कुनै सजाय हुनेछैन । तर यदि उनले त्यसो गरेनन् भने ट्रम्पमाथि सजाय हुन सक्नेछ ।
