काठमाडौं । सातै प्रदेशका मुख्यमन्त्रीहरू आजदेखि हेटौंडामा भेला भएका छन् ।
केन्द्र सरकारले आवश्यक कानुन बनाएर अधिकार हस्तान्तरण नगरेको भन्दै उनीहरु हेटौंडामा भेला भएका हुन् ।
संघीयता कार्यान्वयनमा आएको लामो समय भइसक्दा पनि महत्त्वपूर्ण कानुन नबन्दा प्रदेश सरकार अधिकार सम्पन्न हुन नसकेको मुख्यमन्त्रीहरूको गुनासो छ ।
कानुन अभावमा कर्मचारी, प्रहरी, शिक्षालगायतका क्षेत्रका काम प्रभावित भएको मुख्यमन्त्रीहरुको ठहर छ । बिहीबार सुरु भएको भेला यही विषयमा केन्द्रित भएर केन्द्र सरकारलाई दवाव दिने कार्यक्रम रहेको छ ।
यसअघि सातै प्रदेशका मुख्यमन्त्रीहरूले गत असारमा पोखरामा भेला गर्दै ६ महिनाभित्र अधिकार दिन माग गरेका थिए । साथै उनीहरुले संविधानले दिएको अधिकार अनुसार कानुन निर्माण गर्न र अधिकार प्रत्यायोजन गर्न माग गर्दै प्रधानमन्त्रीलाई भेटेर दबाब दिएका थिए ।
भेलामा प्रदेश र स्थानीय तहका विज्ञहरू समेत सहभागी छन् ।
